#தன்னம்பிக்கை

#தன்னம்பிக்கை 

முடியாது என்று சொல்வது - சொல்பவரின் ஊன எண்ணம்.

முடியும் என்று சொல்வது- உனக்கான வெற்றியின் மூலதனம்.

வலி என்னும் உளி கொண்டுதான் -தன்னம்பிக்கை எனும் சிலை உருவாகும்

தன்னம்பிக்கை தருமெனின்  - வலி எனும் சாபம் கூட வரமாகும்

குழந்தைகளின் குறும்புகளை - குட்டிக்குட்டி ஊனமாக்காதீர்

குழந்தைகளை சலித்துப் பார்க்காது  - சாதனையாளர்களாகப் பாருங்கள்

பிழை விட்டு அறியும் சரியான பாடங்களே - வாழ்க்கையில் மறக்காது நிலைக்கும்

பயந்து உடைவதல்ல பட்டு உணர்வதே வாழ்க்கையின் உயர்வு

பிழைகளை சுட்டிக்காட்டும் போது பணிந்து கேள்

பிழைகளை குத்திக் காட்டும் போது நிமிர்ந்து செல்

இயலாமையின் மொழி குறை பேசுவது!

உனக்கு பிறர் மீதான நம்பிக்கை மாறலாம்  -பிறருக்கு உன் மீதான நம்பிக்கை மாறலாம்

ஆனால் உனக்கு உன்மீதான நம்பிக்கை மாறக்  கூடாது - பிறர் மாற்றவும் விடக் கூடாது

முயற்சியே செய்யாதவன் முயற்சிப்பவனைப் பார்த்து கேலி செய்வான்

கேலியும் கிண்டலும் இயலாமையின் குண இயல்பு

ஆக்கமும் ஊக்கமுமே தன்னம்பிக்கை உணர்வு

தேய்கின்ற நிலவை

நிறுத்த முடியாது

முழுமதியானதும்

சிறைபிடிக்கவும் இயலாது

வாழ்க்கையில் வரும்

துன்பத்தை  துரத்தவும் முடியாது

இன்பத்தை நிறுத்தவும் இயலாது

துன்பம் பரீட்சைக்கு படிப்பது போல

ஒவ்வொருவரும் படிக்கும் அளவுக்கே

பரீட்சையின் முடிவு இன்பத்தை தரும்

தன்னம்பிக்கை என்பது

வெற்றியின் ஊக்கம் 

பயத்தின் நீக்கம்

நேர்மையின் அடையாளம் நேசத்தின் உணர்வாலயம்

அறிவின் ஆக்கம் அறியாமையின் அழிவு

தன்னம்பிக்கியை  - உனக்கு நீயே  - வரம் கொடுக்கும் சாமி

வரம் கொடு வாழக்கை வளமாகும்.

By Prasanth Satkunanathan

நகைச்சுவை

நகைச்சுவை

சந்தோஷம் என்பது வாழ்க்கையின் மருந்து

நகைச்சுவை என்பது வாழ்க்கையின் சந்தோஷ விருந்து

துன்பத்தின் விடுதலை வழி ,நகைச்சுவைக்கு அடிமையாதல்

நகைச்சுவை உணர்வுடன் , நாளும் இடைவிடா  இன்ப விடியல் 

நகைச்சுவை சிரிப்பொலியே  நட்பின் தேசியகீதம்

நகைச்சுவை உணர்வு  உருவாக்கும் கருவே நட்பு

நகைச்சுவை வரமே நட்பின் குறைவற்ற செல்வம்

நகைச்சுவை மன்னர்கள் ஆளும் ஆனந்த உலகம் நட்பு

கல்வி  திட்டத்தில் இல்லாமலே கற்றது நகைச்சுவை

விடை பெறும்  வேளையில் விழி ஒர கண்ணீர் வலியாக

வலித்தாலும் வாழ்க்கை முழுதும் இன்ப நினைவுகளாக

நகைச்சுவைகள் நினைவானாலும் நிகழ்கால இன்பம்

கஷ்டங்களை கடந்து வர , உருவம் இல்லாத  உறவாக நகைச்சுவை

ஆய கலைகளும் அதிசயமாக பார்க்கும், இன்ப கலை நகைச்சுவை

வீட்டிலும் வெளியிலும், இன்பத்தின் முகவரி ,இன்ப சிரிப்பொலியே

இன்பத்தை மட்டும் வரம்  தரும் நகைச்சுவையாளர்கள் இறைவனாக

வலு கொடுக்கவே நகைச்சுவை வலி கொடுக்க அல்ல

இயலாமையை வைத்து உரு பெறுவதல்ல நகைச்சுவை

இன்பத்தை கூட்டி துன்பத்தை நீக்க கரு பெறுவதே நகைச்சுவை

கண்ணீரை மறைக்கவே நகைச்சுவை உருவாக்க அல்ல

உலகில் வெறுக்க முடியாதவற்றுள் நகைச்சுவையும் ஒன்று

நகைச்சுவை இருந்தால் நீளும் இளமையின் ஆயுட்காலம்

விழித்திரையில் நரை தெரிந்தாலும் மன திரையில் தெரியாது

நகைச்சுவை உணர்வு கொடை , வாழும் வரை இன்ப வரம்

By Prasanth Satkunanathan

எதிர்பார்ப்பு

எதிர்பார்ப்பு

விழிகளின் எதிர்பார்ப்பு அழகிய காட்சிக்காக

செவிகளின் எதிர்பார்ப்பு இன்னிசை விருந்திற்காக

உடலின் ஓவ்வொரு அணுவிற்கும் ஒவ்வொரு எதிர்பார்ப்பு

எதிர்பார்ப்புகள் எதுவாயினும் இன்பமே பதிலாக ஆசை

இயற்கையை அணைத்தால்  தாயாகக் காக்கும்

இயற்கையை ஆழித்தால் மாறாக தாக்கும்

எதிர்பாக்கும் இடத்தில் எதிர்க்க கூடாது

இல்லையேல் எதிர்பார்ப்பு இன்பமாகாது

எதிர்ப்பார்ப்பு இல்லாத மனிதனால் இயங்கவே முடியாது

எதிர்பார்ப்பு கண் மூடி கனவு காண்பதல்ல களம் காண்பதே

எதிர்பார்ப்புக்களே வாழ்க்கை சக்கரத்தை நகர்த்தும் சக்தி

எதிர்பார்ப்பு உயிர்ப்பானது இல்லையேல் வாழ்க்கையே ஊனமாக

உன்னை அறிந்து எதிர்பார்ப்பதே உனக்கு நலம் சேர்க்கும்

உனை வளர்க்காதவை எதிர்பார்க்க கூடாத  எதிர்பார்ப்புக்கள்

தேவையான எதிர்பார்ப்பு நீ விருப்பியபடி வாழ நினைப்பது

தேவையற்ற எதிர்பார்ப்பு பிறர் போல வாழும் பேராசை

எதிர்பார்ப்புகள் உன்னையும் பிறரையும் சிதைக்க கூடாது

எதிர்பார்ப்புக்கள் உன்னை இயக்கவே உன்னை இழக்க அல்ல

உன்னை அறிந்த பின்பே  எதிர்பார்ப்பின் எல்லையை வகு

இறக்கை முளைப்பதல்ல எதிர்பார்ப்பு இறக்கும் வரை வாழ நினைப்பதே 

By Prasanth satkunanathan 

ப்ரியமான பயணம்!!!

ப்ரியமான பயணம்!!!

சுற்றும் பூமியில் சுற்றி பார்க்க கோடி இடங்கள் 

பலருக்கு பிடித்த விடயம் பிடித்தவருடன் பயணம் 

கடல் தரை வான் என பயணிக்கும் விதம் பலவிதம் 

ஆச்சர்ய சந்தோசங்கள் தொடரும் ப்ரியமான பயணம்!

சொந்தங்கள் சந்திக்க நேரமில்லா அவரச உலகில் 

உடன் பிறந்தவரோடு சந்தோச சங்கமம் பயணம் 

பயணங்கள் செல்லும் பாதையில் திசைகள் பிரிந்தாலும் 

பயண  வேளை பாச உறவுகளை இணைக்கும்  

நண்பர்களோடு பயணம் சுக சுந்தந்திர எல்லை 

சிரிப்பிற்கும்  வேடிக்கைக்கும் இடைவேளை இல்லை 

காதலோடு பயணம் நிஜ உலகம் மறந்த சுக போதை 

முடிக்க விரும்பாது  தொடர இறைவனிடம் கெஞ்சல்

தொலை தூர பயணத்தில் வாகனம் செலுத்துவது 

தொலையும் நேரத்திற்குள் தொல்லைகள் மறக்கும்

உடன் வருபவர் உயிர் காக்கும் கடவுளான உணர்வு 

பயணத்தின் இதய துடிப்பு, கேட்கும் இடைவிடா இசை

மழைக்காலம்   நீண்ட பயணம் 

தெருவின் இரு பக்கமும் மரங்கள் 

தெருவிற்கு கூரை அமைத்தது போல் 

ஒன்றை ஒன்று முத்தமிடுவது போல்

பச்சை இலை மேல் உள்ள மழைத்துளி 

பார்க்கும் போது ஏற்றப்படும் உணர்வு 

விபரிக்க முடியாத பெயரிடப்படாத புதிய உணர்வு 

வானொலியில் இளையராஜாவின்  காதல் பாடல்கள் - ஆகா 

என்ன ஒரு இனிய பிரயாணம் முடிக்க விரும்பாத பயணம் 

என்றென்றும் நெஞ்சில் பசுமையாக

உறவுகளை இன்னும் பலப்படுத்தும் இனிய பயணம் 

பார்க்கும் இடங்கள் பகிரும் உணவுகள் ஆனந்த அனுபவம் 

செல்லும் இடத்தில் கிடைக்கும் சிநேகங்கள் தொடர ஏங்கும் 

பயணங்கள் பலவிதம் ஓவ்வொன்றுமே ப்ரியமான பயணம்!

By Prasanth Satkunanathan

#கடிதம்.

#கடிதம்.

இதயங்களை இடங்களை இணைத்து 

மொழி அறிவின் ஆயுளை அதிகரித்து

உணர்வும் மொழியும் ஒன்றாக இணைந்த

இணையற்ற உலக தொடர்பாடல் கடிதம்

மன உணர்வுகளின் நிஜ மொழி மாற்றம்

மை கொண்டு எழுதப்படும் மெய் கடிதம்

கையால் எழுதும் கடிதம் அன்பும் அக்கறையும்

உறவை மொழியை அழியாது காக்கும்

சைக்கிள் மணி ஓசை கேட்கும் போதெல்லாம்

மானாக நாம் மாறி துள்ளவது பேரானந்தம்

காகத்தின் கரைதல் கூட காதில் குயில் ஓசை

தபால் காரன் கடவுள் ஆவான் கடிதம் வரமாகும்

கடிதம் எழுதும் நேரம் தேவைகள் மெய்யாகும்

கடிதத்திற்கு காத்திருக்கும் நேரம் சுக வலியாகும்

கடிதம் வாசிக்கும் நேரம் மொழிகள் உயிர் பெறும்

உருவம் இல்லாது  உறவான தொடர்பாடல் கடிதம்

காதலை இணைத்து காதலருக்கு வரமானது

உறவுகளை சேர்த்து உயிரோடு உறவானது

அகிலத்தை இணைத்து தேவைகள் பூர்த்தியானது

கடிதம் காலம் மாறினாலும் மறக்க முடியாத சேவை

By - Prasanth Satkunanathan

என் சுவாச காற்றே

என் சுவாச காற்றே

நீ இல்லா இடம் பூமியில் இல்லை

நீ இன்றி உயிர்கள் பூமியில் இல்லை

ஐம்பூதங்களில் ஒன்றாய் உயர்வானாய்

பூமியே சுவாசிக்க வரம் தந்த சாமியானாய்

உன்னில் ஒட்சியனை  பிரித்து தந்து

சுவாசிக்க வைத்து பிரியம் வென்றாய்

உலக ஜீவன்களின் உயிர் கொடை வள்ளல்

உலகமே நம்பும் உணர முடிந்த  தெய்வம்

அழகிய பட்டங்கள் காற்றில் பறக்கும் வேளை

அழகிய கனவுகள் கண் முன்னே நிஜமாகின

ஆயிரம் முத்தங்கள் காற்றிற்கு அன்பு பரிசு

காற்றின் அழகிய பயணங்கள் முடிவதில்லை

இயற்கையின் இடைவிடா இலவச காற்றாடி

சூடேற்றி விளையாடும் பகல் நேர காற்று குறும்பு

தாலாட்டி தழுவும் இரவு நேர காற்று இனிமை

இரவும் பகலும் ஊடலும் கூடலுமாய் காதலான  காற்று

இயற்ககையை வேண்டி நின்றால்  அன்பைக்  கொடுக்கும்

இயற்கையை சீண்டிப்  பார்த்தல் அழிவைக்  கொடுக்கும்

மாசு படுத்தின்  பூமி பூகம்பமாய் பதில் தந்து அழிக்கும் 

காற்றை கழிவறையாக்கின் பூமியே கல்லறையாகும்

By Prasanth Satkunanathan ( Heartbeat)

சமாதானம்

சமாதானம்  

சண்டை இல்லாத  சந்தோச வாழ்விற்காய்

துரோகம் அற்ற  நேர்மையான நேசத்திற்காய்

மிதித்து வாழாத மதிக்கும் மனத்திற்காய்

பிரிவு இல்லாத இணைந்த சமாதானம் தேவை

மனதில் அழுக்கை நீக்க அன்பு பெருகும்

பிறப்பால் நாம் மனிதர்கள் தேவைகள் வேறு

வேறுபாடுகளை அறிதலும் புரிதலும் தேவை

வேறுபாடுகளை மதிக்கின்ற மனமே சமாதானம்

சமாதான அறிவு வீட்டில் ஆரம்பிக்க வேண்டும்

வாழும் சூழலே மனித பண்பை தீர்மானிக்கும்

வீட்டில் சண்டையை தவிர்ப்பது சமாதான முதல் வழி

வீட்டில் சமாதானம் இருப்பின் வெளியிலும் தொடரும்

உறவுக்குள் சமாதானம் உணர்வுகளின் புரிதல் 

உணர்வுகளின் புரிதல் உள்ளங்களை இணைக்கும்

உள்ளங்கள் இணைந்த பின் உறவுக்குள் சந்தோசம்

உறவுக்குள் சமாதானம் உலக சமாதான ஆரம்பம்

வீட்டை தாண்டி  வர துணை வந்த உறவு நட்பு

உதிரம்  பகிராத  பாசம் பகிர்ந்த புதிய உணர்வு

வீட்டை தாண்டியும் தொடரும் அன்பும் காவலும்

நட்புக்குள் சாமாதானமே உலக சமாதான வழி 

மனங்களில் சமாதானம் விதைக்க பட்டால்

வீட்டில் சமாதானம் உறவினை இணைக்கும்

நட்புக்கள் சமாதானம் நாட்டிற்குள் விடுதலை

நாட்டின் சமாதானம் உலக சமாதான சந்தோசம்

By Prasanth Satkunanathan